بەغدا.. دەستگیركردنی ٣٠ هەزار و ٩١٨ كەس

بەغدا ــ AA

فەرماندەیی ئۆپەراسیۆنەكانی بەغدا رایگەیاند کە هێزە ئەمنییەکان ٣٠ هەزار و ٩١٨ كەسیان دەستگیرکردووە هۆی ئەوەی کە قەدەغەکردنی هاتوچۆیان پێشێلکردووە.

ئاژانسی هەواڵیی فەرمی عێراق بڵاوی کردەوە کە فەرماندەیی ئۆپەراسیۆنەكانی بەغدا راگەیەندراوێكی بڵاوكردووەتەوە و تیایدا ئاماژەی بەوەداوە كە هێزە ئەمنییەكان لە ١٧ی ئادارەوە تا ٢٥ی ئەم مانگە، ٣٠ هەزار و ٩١٨ كەسیان دەستگیركردووە بەهۆی ئەوەی کە قەدەغەكردنی هاتوچۆیان پێشێلكردووە.

لە راگەیەندراوەكەدا هاتووە "لەو ماوەیەدا، دەست بەسەر هەزار و ٦٤٢ ماتۆرسكیلدا گیراوە، هەروەها ژمارەی سزاكان گەیشتووەتە ٧١ هەزار و ٩٢٩ سزا، جگە لەوەش ئاسانكاری بۆ چوونی ٤٧ هەزار و ٨٠٣ بارهەڵگری خۆراک بۆ بەغدا كراوە".

لە راگەیەندراوەكەدا، داوا لە هاووڵاتییان كراوە كە بەتەواوی پابەندی بڕیاری قەدەغەكردنی هاتوچۆ بن و جەختكراوەتەوە لەسەر ئەوەی كە هێزە ئەمنییەكان بەتوندی مامەڵە لەگەڵ ئەو كەسانەدا دەكەن ئەگەر هەوڵ بدەن قەدەغەكردنی هاتوچۆ پێشێل بكەن و تەنانەت رێوشوێنی یاساییش بەرامبەر ئەو كەسانە دەگیرێتە بەر.