سلێمانی.. بەهۆی رووداوێکی هاتوچۆ سێ کەس برینداربوون

سلێمانی - AA

بەهۆی رووداوێکی هاتوچۆ لەسەر شارێی سالم، سێ کەس برینداربوون کە برینی یەکێکیان سەختە.

کاتژمێر١٠:٣٠ی ئەمڕۆ، لەسەر شاڕێی سالم و لە بەردەم شارەوانی سلێمانی لە نزیک بەرزەپردی خەسرەوخاڵ، بەهۆی بەهۆی رووداوێکی هاتوچۆ، سێ کەس برینداربوون کە برینی یەکێکیان سەختە.

تیمەکانی فریاکەوتن گەیشتنە شوێنی رووداوەکە و بریندارانیان گواستەوە بۆ نەخۆشخانە.

بەپێی گوتەی شایەتحاڵەکان، ئۆتۆمبێلێک لە جۆری BMW، بە خێراییەکی لەڕادەبەر لە سایدی ئاسیاسێڵەوە بەرەو پردی خەسرەوخاڵ تیژڕەوی دەکات و دوای ئەوەی کۆنترۆڵ لەدەست دەدات، خۆی دەکێشێت بە راگر و ستوونی کارەبایی جیاکەرەوەی ناوەڕاستی شەقامەکە و دواتر دەچێتە سایدی ئەوبەر و وەردەگەڕێت.

لەو نێوەندەدا ئۆتۆمبێلێک لە جۆری هیۆندای سۆناتا کە دوو سەرنشینی تێدادەبێت، ستوونی کارەبایان بەسەردا دەکەوێت و بەهۆیەوە دوو سەرنشینی ناوی برینداردەبن کە برینی یەکێکیان سەختە.

شۆفێری BMWەکەش بە سووکی برینداربووە.

لەئێستادا پۆلیسی هاتوچۆ سەرقاڵی لێکۆڵینەوەن لە رووداوەکە و دەستنیشانکردنی زیانەکانی رووداوەکە.

زیانێکی زۆر بەر ستوونی کارەبا و راگری نێوەندی شەقامەکان گەیشتووە.