„Македонија даде голем придонес во затворањето на „Балканската рута“

СКОПЈЕ (АА) - Македонскиот министер за одбрана, Зоран Јолевски денеска учествува на заеднички состанок на министрите за одбрана и за внатрешни работи на земјите од Централно-европската одбранбена соработка и Салцбург форумот, кој се одржува во Виена, Австрија, пренесува Anadolu Agency (AA).

Според соопштението од Министерството за одбрана на Република Македонија на состанокот посветен на заедничкото менаџирање на миграциските предизвици, министерот Јолевски истакнал дека Република Македонија даде голем придонес во затворањето на балканската бегалска рута, а посочил и дека државните институции на Македонија реагираа соодветно, ефективно и координирано.

Во тој контекст, како што се соопштува, тој укажал и на солидарната помош која Македонија ја доби од Австрија, Хрватска, Чешка, Унгарија, Полска, Словачка, Словенија и Србија, како земји кои распоредија свои полициски службеници на северната и јужната граница во поддршка на македонската Полиција.

Министерот Јолевски во обраќањето се осврнал и на следните чекори кои е потребно да се преземат со цел одржување на безбедноста и стабилноста на регионот и пошироко.

„Ние очекуваме дека сите мерки превземени од Европската Унија, НАТО – Алијансата и државите во овој формат, ќе дадат добри резултати. Во тој контекст, од Европската Унија очекуваме интензивен ангажман и лидерство“.

Се соопштува дека министерот Јолвски рекол дека договорот ЕУ-Турција мора да се почитува, дека постои потреба од унапредување на координацијата и размената на информации и податоци помеѓу земјите на т.н. „Балканска рута“, а воедно и дека треба да се забрзаат интегративните процеси на земјите од регионот во ЕУ и НАТО.

„Предизвиците на актуелната мигрантска криза ни говорат дека средбите од овој формат треба да станат редовна пракса, со очекување истите да дадат нов импулс во зајакнувањето на соработката“, рече министерот пред министри за одбрана и за внатрешни работи на 14 земји од Европа, вклучувајќи го и министерот за внатрешни работи на Република Македонија, Агим Нухиу.

На маргините на состанокот, министерот Јолевски оствари и билатерална средба со австрискиот министер за одбрана, Ханс Петер Доскозил.