Мијатовиќ: „11 јули да биде прогласен за Ден на сеќавање на жртвите од геноцидот во Сребреница“

БЕЛГРАД (АА) – Комесарката за човекови права на Советот на Европа, Дуња Мијатовиќ, денес побара 11 јули да биде прогласен за официјален Меѓународен ден на сеќавање на жртвите од геноцидот во Сребреница, пренесува Анадолу.

Изјавите на Мијатовиќ се дадени во писмена и видеоизјава на 28-годишнината од геноцидот во Сребреница во кој повеќе од 8.000 мажи и момчиња босански муслимани беа убиени од српските сили во 1995 година.

„Извршувањето на геноцидот во Сребреница не е прашање на ничие мислење, тоа е историски факт, правно утврден од Меѓународниот кривичен трибунал за поранешна Југославија, Меѓународниот суд на правдата и домашните судови“, рече Мијатовиќ.

Според неа, многу луѓе не се свесни за геноцидот, а некои дури и го негираат.

„Ова е навреда за жртвите и сериозна закана за правдата и мирот во регионот. Оваа култура на негирање на геноцидот мора да се искорени“, додаде таа.

„Соочени со широко распространето негирање на геноцидот во Сребреница, крајно време е меѓународната заедница да престане да гледа на другата страна. Воспоставувањето на Денот на сеќавање ќе покаже дека меѓународната заедница стои на страната на вистината и во солидарност со преживеаните и семејствата на жртвите“, рече Мијатовиќ.

- Геноцид во Сребреница

Во јули 1995 година Сребреница беше опколена од српските сили што се обидуваа да им ја одземат територијата на босанските муслимани и Хрвати за да формираат држава.

Советот за безбедност на ОН ја прогласи Сребреница за „безбедна област“ во пролетта 1993 година. Сепак, српските трупи предводени од генералот Ратко Младиќ - кој подоцна беше прогласен за виновен за воени злосторства, злосторства против човештвото и геноцид - ја прегазија зоната на ОН.

Холандските трупи не успеаја да дејствуваат додека српските сили ја окупираа областа, убивајќи 2.000 мажи и момчиња во еден ден на 11 јули.

Околу 15.000 сребреничани побегнале во околните планини, но српските војници ги ловеле и убиле уште 6.000 луѓе.

Телата на жртвите на геноцидот беа пронајдени во 570 различни делови на земјата.

Меѓународниот суд на правдата во Хаг во 2007 година пресуди дека во Сребреница бил извршен геноцид.

На 8 јуни 2021 година судиите на Трибуналот на ОН ја потврдија пресудата со која Младиќ е осуден на доживотен затвор за геноцид, прогон, злосторства против човештвото, истребување и други воени злосторства во Босна и Херцеговина.