СКОПЈЕ (АА) - Министерството за надворешни работи на Северна Македонија ги повика сите свои граѓани да ги напуштаат загрозените подрачја во Словенија, која е зафатена од големо невреме, пренесува Анадолу.
Според соопштението на МНР на Северна Македонија, поради големото невреме што ја зафатило Словенија, затворени се голем број патишта и автопатишта низ целата земја.
„Ги повикуваме сите граѓани на Република Северна Македонија да ги напуштаат загрозените подрачја, особено подрачјата покрај реките. Исто така, ги повикуваме граѓаните што планираат да патуваат во Словенија или да транзитираат преку неа, да проверат кои патишта се слободни“, се вели во соопштението.
„Наедно се замолуваат нашите граѓани, доколку се наоѓаат во погодените региони и имаат потреба од евентуална помош, да контактираат со Амбасадата на Северна Македонија во Љубљана“, се додава во ова соопштение.
Меѓу другото, министерката за одбрана на Северна Македонија, Славјанка Петровска, во објава на социјалните мрежи нагласи дека ѝ подаваат рака на пријателската Словенија поради невремето.
„Ѝ подаваме рака на пријателска Словенија. Со големо жалење ја следиме состојбата во Словенија која ја погодија големо невреме и поплави. Не можеме да го гледаме ова, а да не понудиме помош. Подготвени сме да подадеме рака и да помогнеме во справувањето со последиците од ова невреме и да покажеме дека вистински пријатели се познаваат во тешки моменти. Заедно сме посилни“, напиша Петровска.
