Седум од 10 муслимани во Велика Британија изложени на исламофобија на работното место

ВЕЛИКА БРИТАНИЈА (АА) - Истражувањето спроведено во Велика Британија покажа дека 7 од 10 муслимани се изложени на исламофобични дејства на работното место, пренесува Агенција Анадолија (АА).

Веб-страницата „Hyphen“, која се фокусира на прашања поврзани со муслиманите во Велика Британија и европските земји, од 22 април до 10 мај спроведе анкета со 1.503 муслимани, од кои 700 се млади (18-24 години), што живеат во Велика Британија.

Истражувањето го испитуваше исламофобичното однесување со кое се соочуваат муслиманите при нивната работа и нивното учество во општеството.

- Муслиманите Афроамериканци се најмногу изложени на исламофобични дејства -

Според резултатите од истражувањето, 7 од 10 (69 отсто) муслимани кои живеат во Британија и моментално работат се изложени на исламофобични дејства на работното место.

Исламофобичното однесување кон вработените муслимани најчесто се случува при интеракција со клиенти или надворешни лица (44 отсто), на социјални настани организирани на работното место (42 отсто) и при обид да се добие унапредување (40 отсто).

Најмногу на исламофобични дејствија се изложени муслиманите Афроамериканци. 37 отсто од британските муслимани велат дека тоа го доживеале за време на процесот на примање на работа. Се забележува дека оваа стапка е 58 отсто кај вработените муслимани Афроамериканци.

- Зголемено учество на муслиманите во општеството во Велика Британија -

Во истражувањето се истакнува дека зголемените трошоци за живот во последните години негативно се одразиле и на животот на муслиманите во Велика Британија.

54 отсто од анкетираните британски муслимани изјавиле дека сега е потешко да се подмират основните трошоци, како што се сметките за комунални услуги, храната и горивото отколку пред пет години.

Од друга страна, според резултатите од истражувањето, и покрај исламофобијата и зголемените животни трошоци во Велика Британија, сè уште постои широк оптимизам во однос на учеството во општеството.

Во споредба со пред 5 години, 68 отсто од анкетираните го делат мислењето дека учеството на муслиманите во општеството во Велика Британија е зголемено.

Со новоотворената веб-страница „Hyphen“ управуваат Мартин Њуланд, поранешен уредник на „Дејли телеграф“ и „Нешнал“, и Бурхан Вазир, кој претходно има работено за „Тајмс“, „Обсервер“ и „Ал Џезира“.

Веб-страницата „Hyphen“ со седиште во Лондон има за цел да ја истакне растечката улога на речиси 30 милиони муслимани од европскиот континент во обликувањето на културниот, политичкиот и економскиот пејзаж на континентот.