Отворена изложбата "Одбележување на стогодишнината од распарчувањето на Македонија и од Првата светска војна"

СКОПЈЕ (АА) - Во состав на меѓународниот симпозиум ,,Стогодишнината од Првата светска војна, фронтот Чанаккале и нивните глобални последици" во просториите на иновативниот центар на Т-Home, Државниот архив на Република Македонија ја отвори изложбата "Одбележување на стогодишнината од распарчувањето на Македонија и од Првата светска војна" , јавува Anadolu Agency.

Изложбата опфаќа фотографии, документи и материјал од богатата ризница на Државниот архив на Република Македонија.

Според организаторот на изложбата, Државниот архив на РМ, целта е да се прикажат што помалку познати материјали, со кои јавноста ќе добие барем мала претстава за тоа каква била ситуацијата во Македонија на почетокот на ХХ век и како било секојдневието на тогашните македонски граѓани.

На отворањето на изложбата присуствуваа Директорот на Државниот архив на Република Македонија Филип Петровски, Директорот на Државниот архив на Република Турција Угур Унал, Дора Јурукова која е еден од авторите чии фотографии се изложени, како и бројни претставници на државни институции, невладини организации, научници и заинтересирани граѓани, љубители на историјата и уметноста.