ИСТАНБУЛ (АА) - Научниците идентификуваа нов вид биолуминисцентен морски полжав, Батидевиус каудактилус, во батијалната зона на длабокиот океан, која се протега од 1.000 метри до 4.000 метри под површината на океаните, јавува Анадолу.

Истражувачите од Институтот за истражување „Монтереј Беј аквариум“ изјавија дека ова мистериозно суштество, наречено „мистериозен мекотел“, има уникатна комбинација на карактеристики што ги остави научниците и заинтригирани и зачудени.

Повеќе од две децении, научниците од Институтот беа во потрага за декодирање на природната историја на Батидевиус.

„Вложивме повеќе од 20 години во разбирањето на природната историја на овој фасцинантен вид голожабрени полжави (нудибранхи)“, рече Брус Робисон, постар научник во Институтот.

Нивната работа резултираше со неодамнешна студија објавена во журналот „Deep Sea Research“, опишувајќи ја необичната анатомија и однесувањето на видот.

За разлика од другите морски мекотели, Батидевиус користи кавернозна качулка, слично на „растението Замката на Венера“, за да ги фати малите ракови.

Во импресивна адаптација, мекотелот користи и биолуминисцентна одбрана, создавајќи „стабилно блескава проекција како прст од опашката“ за да го одвлече вниманието на потенцијалните предатори, објави Институтот.

Со својата проѕирна, желатинозна качулка и опашка украсена со проекција налик на прст, Батидевиус отвори ново поглавје во истражувањата на длабоките делови од морињата и океаните.

„Нашето откритие е ново парче од сложувалката што може да помогне подобро да се разбере најголемиот хабитат на Земјата“, рече Робисон.

Тимот на Институтот сега се фокусира кон поопширно истражување на овој уникатен морски мекотел кој потенцијално би можел да открие други непознати чуда во длабочините на океаните.