Elena Teslova
09 Август 2025•Ажурирај: 10 Август 2025
МОСКВА (АА) - Советникот за надворешна политика на Кремљ, Јуриј Ушаков, денес потврди дека средбата меѓу рускиот претседател Владимир Путин и американскиот претседател Доналд Трамп е закажана за 15 август во американската држава Алјаска, известува Анадолу.
Ушаков ги нагласи логистичките предности од одржувањето на средбата во Алјаска, истакнувајќи ја нејзината близина до Русија преку Беринговиот теснец.
„Американската страна штотуку објави дека е постигнат договор за организирање средба меѓу претседателите на Русија и САД, Владимир Путин и Доналд Трамп, на 15 август, петок, во Алјаска. Русија и САД се блиски соседи, делат заедничка граница. Се чини сосема логично нашата делегација едноставно да прелета преку Беринговиот теснец, а важниот и очекуван самит на лидерите на двете земји да се одржи токму во Алјаска.“, рече тој на прес-конференција во Москва.
Трамп претходно на патформата Truth Social објави дека очекува да се сретне со Путин во Алјаска на 15 август. Тоа ќе биде првата лична средба меѓу лидерите откако Трамп се врати во Белата куќа во јануари.
Ушаков додаде дека Алјаска и арктичкиот регион претставуваат природна пресечна точка на руските и американските интереси, со потенцијал за билатерални проекти од голем обем.
„Но, секако, претседателите ќе се концентрираат на дискусија за опциите за постигнување траен мир во решавањето на украинската криза“, забележа тој.
Подготовките за самитот, опишани од Ушаков, се „предизвикувачки процес“, кој е во тек, при што двете страни се обврзуваат на интензивна координација.
„Во наредните денови, Москва и Вашингтон ќе се посветат на интензивна практична и политичка подготовка за состанокот на високо ниво во Алјаска. Тоа ветува дека ќе биде тежок процес, но ние ќе се вклучиме активно и интензивно во него“, рече тој.
Кремљ соопшти дека очекува следниот претседателски состанок по Алјаска да биде во Русија.
„Ако гледаме напред, природно е да се стремиме кон одржување на следниот претседателски состанок меѓу Владимир Путин и Доналд Трамп на руска територија. Соодветна покана веќе е упатена до американскиот претседател“, додаде Ушаков.
