ИСТАНБУЛ (АА) - Турскиот претседател Реџеп Таип Ердоган и премиерот на Велика Британија Кир Стармер денес разговараа во врска со билатералните односи, како и за регионални и глобални прашања, соопшти Директоратот за комуникации на Туркије, јавува Анадолу.

Ердоган го пречека Стармер во Баку на маргините на Самитот на светските лидери на ОН за климатски промени (COP29).

„Претседателот Ердоган изјави дека ќе продолжат напорите за развивање на односите меѓу Туркије и Обединетото Кралство и за зголемување на обемот на трговијата“, соопшти Директоратот на социјалната мрежа X.

Турскиот лидер, исто така, изјави дека напорите на Анкара се во тек за ставање крај на конфликтите во регионот, особено во Украина, Либан и Палестина.

На состанокот присуствуваа и турскиот министер за надворешни работи Хакан Фидан и претставници на Директоратот за комуникации.

Вчера во Баку започна 29-тата Конференција на страните (COP29) на Рамковната конвенција на ОН за климатски промени (UNFCCC), на која се собраа светските лидери, креаторите на политиката и активистите да разговараат за решавање на сè поинтензивните климатски кризи.

Овогодинешната конференција во Азербејџан ветува акцент на преземените обврски и иновативните механизми за финансирање за да се поттикне глобалниот напредок.