„Иран нема да преговара со САД“, вели висок официјален претставник

ИСТАНБУЛ (АА) – Секретарот на Врховниот совет за национална безбедност на Иран, Али Лариџани, денес ги демантираше тврдењата дека Техеран се обидел да ги обнови преговорите со Вашингтон, истакнувајќи дека Иран нема да влезе во разговори со САД, јавува Анадолу.

Лариџани, преку објавата на американската компанија за социјални медиуми Х, реагираше на извештаите според кои Иран почнал нови иницијативи за преговори со САД.

Осврнувајќи се на извештајот на Ал Џезира, кој се повикува на „Волстрит журнал“, а во кој се тврди дека Лариџани се обидел преку Оман да ги обнови разговорите со Вашингтон, тој порача: „Нема да преговараме со САД.“

Во посебна објава Лариџани се осврна и на изјавите на американскиот претседател Доналд Трамп во врска со Иран.

Критикувајќи го Трамп дека го турнал регионот во хаос со „празни илузии“, Лариџани изјави дека американскиот претседател сега е загрижен за натамошни загуби на американски војници.

„Со сопствените заблуди тој го претвори слоганот ‘Америка на прво место’ во ‘Израел на прво место’ и ги жртвуваше американските војници за жедта за моќ на Израел“, наведе тој.

Тој понатаму го обвини Трамп дека „ги тера американските војници и нивните семејства да ја платат цената со нови лаги“.

Во заедничката операција на САД и Израел, започната во саботата, според извештаите, убиени се неколку високи ирански официјални претставници, меѓу кои и врховниот лидер ајатолахот Али Хаменеи.

Техеран возврати со напади со беспилотни летала и ракети насочени кон земји од Заливот. Во операциите убиени се тројца американски војници, а петмина се тешко повредени.