ИСТАНБУЛ (АА) - Катарскиот премиер и министер за надворешни работи, Мохамед бин Абдулрахман Ал Тани, изјави дека не го прифаќаат изгладувањето или употребата на гладта против палестинскиот народ како оружје од страна на Израел, известува Анадолу.

По состанокот со министерот за надворешни работи на Туркије, Хакан Фидан, во главниот град Доха, Ал Тани и Фидан одржаа заедничка прес-конференција.

Ал Тани рече дека со турската страна разговарале за обновените израелски напади врз Појасот Газа.

Нагласувајќи дека Катар продолжува со напорите заедно со своите партнери да се стави крај на оваа војна и двете страни да се вратат кон прекинот на огнот, Ал Тани истакна:

„Не можеме да го прифатиме изгладнувањето на братскиот палестински народ или употребата на гладта како оружје. Се обидовме да ги зближиме страните во нашето медијаторство, но се соочивме со злонамерни озборувања.“

Во врска со блокирањето на хуманитарната помош за Појасот Газа од страна на Израел, Ал Тани рече:

„Мора да продолжиме да работиме со сите наши партнери во меѓународната заедница. Мора да преземеме чекори за притисок врз Израел за да може хуманитарната помош, горивото, водата и храната да влезат во Појасот Газа“.

Нагласувајќи дека продолжуваат да се координираат со Египет и другите партнери за да се напредува кон втората фаза од прекинот на огнот во Газа, Ал Тани рече дека целта на тековните преговори е ослободување на заробениците и завршување на војната.

Истакнувајќи дека Хамас постојано и отворено потврдува дека е подготвен да ги ослободи сите израелски затвореници, Ал Тани рече:

„Израел сака сите затвореници да бидат ослободени пред да се стави крај на војната во Газа“.

- „Ја отфрламе секоја можност некој да поседува оружје во Сирија освен државата“

Осврнувајќи се на случувањата во Сирија, Ал Тани рече дека тие ги поддржуваат чекорите преземени од новата администрација во Дамаск за реструктуирање на државата и зајакнување на братството меѓу различните сегменти од населението.

Ал Тани истакна дека Катар ја продолжува комуникацијата со другите братски земји за поддршка на мировните напори во Сирија и додаде:

„Секако, сето ова треба да биде во согласност со интересите и желбите на сирискиот народ. За време на состанокот разговаравме и за санкциите воведени врз братската Сирија. Време е да се укинат санкциите. На тој начин треба да им ги олесниме работите на сирискиот народ. Не прифаќаме никаква интервенција што би му наштетила на суверенитетот на Сирија и ја отфрламе можноста која било страна да носи оружје освен државата.“

Ал Тани во своето обраќање ги поздрави напорите на Оман, кој посредува во разговорите меѓу Иран и САД.

- Преговорите меѓу Израел и Хамас продолжуваат

За време на прес-конференцијата, на прашање дали продолжуваат разговорите за медијација, Ал Тани одговори:

„Преговорите не запреа во изминатите недели. Заедничките напори меѓу Египет и Катар продолжија. Работиме на завршување на војната. Имаше предлог на кој Хамас сега одговори. Преговорите се во тек за завршување на војната и враќање на заробениците. Време е да се заврши војната, нема причина палестинскиот народ да гладува.“

На прашањето дали се отворени патиштата за прекин на огнот, Ал Тани истакна:

„Како што и претходно реков, преговорите никогаш не запреа, работевме континуирано. Договорот постигнат во четвртокот, страните да го продолжат договорот е продолжение на напорите направени во таа насока. Предлогот на Хамас овде беше нешто што постоеше и претходно. И отворено беше објавен. Мора правилно да ги користиме методите на медијација. Мора да ја завршиме војната. Тоа е од суштинско значење и ние го правиме својот дел.“

- „Неосновани се тврдењата дека Катар стои зад студентските протести во САД“

Во врска со тврдењата дека Катар стои зад студентските протести во САД, Ал Тани истакна:

„Целосна бесмислица се сите тврдења дека Катар стои зад студентските протести во САД“.

Нагласувајќи дека односите со американските универзитети се ограничени само со образовните институции во Доха, Ал Тани продолжи со зборовите:

„Секое финансирање што го обезбедува Катар за образовни или истражувачки институции е транспарентно и видливо за сите. Катар е мирољубива земја и одигра важна улога во многу различни посреднички мисии.“