Ekipa
06 Февруари 2023•Ажурирај: 07 Февруари 2023
БРИСЕЛ (АА) - По земјотресот, спасувачки тимови за помош на Туркије досега понудија 13 земји на Европската Унија (ЕУ), објави Европската комисија, пренесува Анадолу.
„Нашите мисли се со сите оние кои ги загубија најмилите и храбрите кои први реагираа во спасувањето на животите“, се огласија со заедничко соопштение високиот претставник на ЕУ за надворешна политика, Жозеп Борел, и европскиот комесар за управување со кризи, Јанез Ленарчиќ.
Во соопштението се наведува: „Десет тимови за урбана потрага и спасување бргу се мобилизирани од Бугарија, Хрватска, Чешка, Франција, Грција, Холандија, Полска и Романија за да ги поддржат оние кои први реагираа на теренот.“
Портпаролот на Европската комисија, Балаж Ујвари, изјави дека слична помош ветиле и Унгарија, Италија, Шпанија, Малта и Словачка.
Комесарите на ЕУ наведоа дека Центарот за итни случаи на ЕУ се координира со Туркије и државите членки на ЕУ за понатамошната помош.
„ЕУ ги поддржува акциите за спасување со својот сателитски систем Коперникус“, се додава во соопштението.
Земјотрес со интензитет од 7,7 степени според Рихтер утрово го потресе јужниот дел на Туркије. Епицентарот на земјотресот беше во областа Кахраманмараш, а земјотресот беше почувствуван во 10 турски области. Во разорниот земјотрес досега животот го загубија најмалку 912 лица, а 5.385 се повредени.
