Американска болница отпушти 175 вработени кои одбиле да се вакцинираат против Ковид-19

ЊУЈОРК (АА) – Болница во американската сојузна држава Северна Каролина отпушти 175 вработени кои одбија да се вакцинираат против Ковид -19, пренесува Агенција Анадолија (АА).

Болничкиот ланец „Новант хелт“ (Novant Health) со седиште во Северна Каролина, во изјава за американските медиуми соопшти дека се раскинати договорите на 175 здравствени работници кои не ја почитувале обврската за вакцинација против Ковид-19.

Здравствената установа, за своите вработени, кои поради медицински или верски причини не можеле да примат вакцина, воведе обврска за неделен тест за Ковид-19, маска Н95 и заштита за очи.

Здравствената установа, која има 35.000 вработени, соопшти дека на 375 вработени кои не се вакцинирале до минатата недела, им дала дополнително време за вакцинација, а дека на оние кои не се согласуваат да се вакцинираат, договорите за вработување ќе им бидат прекинати.

„Новант хелт“ првпат на 22 јули објави соопштение дека е задолжително вработените да ја имаат примено вакцината за заштита од Ковид-19 и им даде рок до 15 септември да бидат целосно вакцинирани.

Болницата „Хјустон методист“ (Houston Methodist) во Тексас, која прво им наложи на своите вработени да ја имаат примено вакцината против Ковид-19, отпушти и 150 здравствени работници поради одбивање да се вакцинираат.

Американскиот претседател Џо Бајден истакна дека вакцината против коронавирус е задолжителна на работни места со најмалку 100 вработени. Минатиот месец, исто така соопшти дека ќе биде намалена федералната помош за домовите за стари лица кои не го вакцинираат својот персонал.