Hakan Çopur
03 Февруари 2024•Ажурирај: 05 Февруари 2024
ВАШИНГТОН (АА) - Американскиот претседател Џо Бајден изјави дека возвратиле на нападот врз американската база со напади на силите на Иранската револуционерна гарда и нивните соработници во Сирија и Ирак, јавува Анадолу.
Бајден упати соопштение во врска со нападот на 28 јануари врз американската база на сириско-јорданската граница.
Истакна дека нападот во кој загинаа тројца американски војници го извршиле групи кои ги поддржуваат силите на Иранската револуционерна гарда.
Тој нагласи дека американските сили синоќа возвратиле на нападот врз американската база.
„Според моите наредби, американската војска погоди позиции на Иранската револуционерна гарда и нивните милитантни групи во Сирија и Ирак. Почнавме да одговараме на нападот и овој одговор ќе продолжи во време и место по наш избор“, рече Бајден.
Истакна дека Соединетите Американски Држави (САД) не водат воен судир на Блискиот Исток, додавајќи дека ќе одговорат само против оние што ги таргетираат американските војници.
Американската централна команда (ЦЕНТКОМ) доцна синоќа објави дека извршила воздушни напади врз позиции на Иранската револуционерна гарда и нејзините други групи во Ирак и Сирија.
ЦЕНТКОМ наведе дека прв пат извршил напади во регионот како одговор на нападот врз американската база на сириско-јорданската граница на 28 јануари.
Во соопштението се наведува дека во воздушните напади биле погодени најмалку 85 позиции на силите Кудс на Иранската револуционерна гарда и нивните соработници во Сирија и Ирак.
Се додава дека во нападите биле вклучени и бомбардери со долг дострел кои полетале од САД и дека биле употребени повеќе од 125 наведувани бомби.
Во соопштението се наведува дека гаѓани биле командно-контролни центри, ракети, проектили и беспилотни летала.
Во нападот на американската база на 28 јануари загинаа тројца американски војници, а над 40 беа ранети.
Американската администрација најави дека како одговор на тој напад ќе започне опсежни напади и дека цел ќе бидат групи поддржани од Иран.
