Бајден следниот месец ќе ги посети Израел, Западниот Брег и Саудиска Арабија

ВАШИНГТОН/АНКАРА (АА) - Американскиот претседател Џо Бајден следниот месец ќе отпатува за Израел, Западниот Брег и Саудиска Арабија, изјави висок претставник на администрацијата, ставајќи крај на повеќемесечните шпекулации за посетата на Бајден на Блискиот Исток, пренесува Агенција Анадолија (АА).

„Тој за време на посетите во период меѓу 13 и 16 јули ќе вклучи ангажмани со речиси десетина колеги од целиот регион и пошироко“, според официјалниот претставник, кој сакаше да остане анонимен.

„Неговата прва станица ќе биде Израел“, рече официјалниот претставник во телефонскиот разговор, додавајќи: „Ова ќе биде прва посета на претседателот Бајден на земјата како претседател, а ќе се случи по речиси 50 години од неговата прва посета на Израел како млад сенатор.“

Во изјавата во која се детализира распоредот на претседателот, портпаролката на Белата куќа, Карин Жан-Пјер, рече дека Бајден ќе се сретне со израелските лидери за да разговараат за безбедноста, просперитетот на Израел и неговата зголемена интеграција во поширокиот регион.

По неговите разговори во Израел, претседателот ќе се упати кон окупираниот Западен Брег, Палестина, за да се сретне со палестинскиот претседател Махмуд Абас и други палестински официјални лица.

Бајден „со нетрпение очекува да ја потврди својата доживотна посветеност на дводржавното решение и да разговара за начините на кои би можеле повторно да го разгорат политичкиот хоризонт што може да обезбеди еднакви мерки на слобода, безбедност, просперитет и достоинство на Израелците и Палестинците.

По посетата на Западниот Брег, Бајден ќе отпатува за Џеда, Саудиска Арабија, каде што ќе присуствува на Самитот на Советот за соработка во Заливот, плус Египет, Ирак и Јордан (познат како GCC+3).

Во врска со разговорите на претседателот во Џеда, Жан-Пјер рече дека Бајден со своите колеги ќе разговара за низа билатерални, регионални и глобални прашања.

„Тоа вклучува поддршка на примирјето во Јемен со посредство на ОН, кое доведе до најмирниот период таму од почетокот на војната пред седум години“, рече портпаролката.

„Тој, исто така, ќе разговара за средствата за проширување на регионалната економска и безбедносна соработка, вклучувајќи нови и ветувачки инфраструктурни и климатски иницијативи, како и за одвраќање на заканите од Иран, унапредување на човековите права и обезбедување глобална енергетска и прехранбена безбедност“, рече таа.

Жан-Пјер додаде дека Бајден „го цени лидерството на кралот Салман и неговата покана“ и „со нетрпение ја очекува оваа важна посета на Саудиска Арабија, која е стратешки партнер на Соединетите Држави речиси осум децении“.

Саудиската официјална прес-агенција (SPA) денес потврди дека посетата ќе биде остварена помеѓу 15 и 16 јули.

- Средба со саудискиот престолонаследник

Запрашан од новинарот дали претседателот ќе се сретне со саудискиот престолонаследник Мохамед бин Салман, високиот функционер рече дека Бајден ќе се сретне со своите колеги и со саудиското раководство.

„Значи, да, можеме да очекуваме претседателот да се види со принцот престолонаследник“, рече функционерот.

Бајден долго време се противеше на средбата со Бин Салман, за кого американското разузнавање утврди дека го наредил страшното убиство на новинарот на „Вашингтон пост“, Џамал Кашоги, во 2018 година во саудискиот Конзулат во Истанбул.

Официјалниот претставник рече дека претседателот ќе ги започне прашањата за човековите права со Саудијците.

„Додека повторно ги калибрираме односите (со Ријад), не сакаме да ги прекинеме односите со Саудиска Арабија, која е стратешки партнер на Соединетите Држави осум децении“, додаде официјалниот претставник.