Betül Yılmaz
09 Септември 2025•Ажурирај: 10 Септември 2025
ИСТАНБУЛ (АА) - Најмалку 64.605 Палестинци се убиени во геноцидната војна на Израел во Појасот Газа од октомври 2023 година, додека уште шест лица починаа од глад во опколената енклава, соопшти денес Министерството за здравство, јавува Анадолу.
Министерството истакна дека 83 тела се донесени во болниците во последните 24 часа, додека 223 лица се повредени, со што вкупниот број повредени се зголеми на 163.319 во израелските напади.
„Многу жртви сѐ уште се заробени под урнатините и на патиштата, бидејќи спасувачите не можат да стигнат до нив“, се додава.
Министерството, исто така, соопшти дека 14 Палестинци се убиени, а над 37 се повредени од оган на израелската Армија додека се обидувале да дојдат до хуманитарна помош во последните 24 часа, со што вкупниот број Палестинци убиени додека барале помош се искачи на 2.444, а над 17.831 се ранети сметајќи од 27 мај.
Министерството соопшти дека уште шест Палестинци починале од неисхранетост и глад во последните 24 часа. Ова го зголеми бројот на смртни случаи поврзани со глад од октомври 2023 година на 399 лица, од кои 140 деца.
Според Министерството, 121 од смртните случаи, од кои 25 деца, се случиле откако системот за следење на гладот, поддржан од ОН, Интегрирана фазна класификација на безбедност на храната (IPC), официјално ја прогласи Газа за зона на глад минатиот месец.
Од 2 март, израелските власти целосно ги затворија сите гранични премини во Газа, втурнувајќи го 2,4-милионското население на територијата во глад.
Израелската Армија ги продолжи нападите врз Појасот Газа на 18 март и оттогаш уби 12.059 луѓе, а повредени се 51.278, кршејќи го договорот за прекин на огнот и размена на затвореници што стапи на сила во јануари.
Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата за својата војна во енклавата.
