ВАШИНГТОН (АА) - Американски воен авион Ф-35 се урна вчера во воздухопловната база Ајелсон во Алјаска, при што пилотот е во безбедна состојба, пренесуваат извештаите, повикувајќи се на воени претставници, јавува Анадолу.
Инцидентот се случил околу 13 часот по локално време на пистата, изјави воздухопловецот од прва класа (A1C) Спенсер Хансон, кој беше цитиран од дневниот весник „Енкорејџ“.
Во соопштението од Канцеларијата за односи со јавноста на 354. Борбено крило, инцидентот бил опишан како „инцидент со авион“ кој предизвикал значителна штета, но останал во рамките на оградата на базата, се наведува во извештајот.
Пилотот бил пренесен во воената болница Басет на преглед, се додава во соопштението.
Полковникот Пол Таунсенд, командант на 354-тото Борбено крило, рече дека воздухопловните сили ќе спроведат темелна истрага за да спречат слични несреќи.
„Нашите луѓе се нашето најважно богатство, и ние сме посветени на обезбедување на нивната безбедност и сигурност“, рече тој.
Причината за несреќата сè уште се истражува.
