Во Катар започна глобален самит за борба против гладот и сиромаштијата

ИСТАНБУЛ (АА) – Првиот самит на Глобалната алијанса за борба против гладот и сиромаштијата започна денес во катарската престолнина Доха, со меѓународно учество, јавува Анадолу.

„Лидери, министри и извршни директори од над 200 земји и организации се собраа во Конвенцискиот центар на Катар за овој еднодневен настан“, соопшти Алијансата во објава на социјалната мрежа Фејсбук.

Настанот се одржува во пресрет на Вториот светски самит за социјален развој и е оценет како „клучен момент во глобалната борба против гладот и сиромаштијата“, се наведува во соопштението.

Самитот следува речиси по една година откако Алијансата беше официјално формирана на самитот на Г20 во ноември 2024 година, под претседателство на Бразил. Еден од главните резултати тогаш беше обврската на Катар да го организира првиот лидерски самит на коалицијата.

Настанот воедно е дел од програмата на Самитот за социјален развој на Обединетите нации, што за првпат се одржува во Доха.

На 31 октомври, постојаната претставничка на Катар во Обединетите нации, Алија Ахмед бин Сајф ал Тани, изјави дека претстојниот самит на ОН за социјален развој ќе биде првата формална сесија на Генералното собрание на ОН што се одржува надвор од Њујорк или Женева, во согласност со правилата за работа на Собранието.