Во Северна Македонија организиран протест за поддршка на Палестина

СКОПЈЕ (АА) – Протест за поддршка и солидарност со палестинскиот народ организираше Платформата за поддршка на Палестина во Скопје, со слоганот „Немој да молчиш за масакрот“, известува Анадолу.

Граѓани од различни националности, особено Турци, Македонци, Албанци, Босанци и Роми, се собраа на историскиот плоштад „Мурат-пашина џамија“ во Старата скопска чаршија, носејќи транспаренти со поддршка за Палестина и против Израел.

На транспарентите пишуваше: „Спасете ја Палестина“, „Спасете ја Газа“, „Слободна Палестина“, „За да ја поддржите Палестина доволно е да сте човек“, „Израел е вистинскиот терорист“, „Престанете да го правите она што ви го правеше Хитлер“, „Поддршката за Палестина значи поддршка за човештвото“, „Молете се за Палестина“, „Не допирајте ја џамијата Ал Акса“, „Стоп за масакрот, ова е геноцид“, „Не можеме да дишеме уште од 1948 година“.

Како дел од протестот, демонстрантите развиорија знамиња на Палестина, Туркије, Албанија и Северна Македонија, беше рецитиран Куранот, кажани беа молитви и беа извршени погребни молитви во отсуство за оние кои ги загубија животите во нападите.

Декларацијата на организаторите беше прочитана на 3 јазици: турски, македонски и албански.

Посочувајќи дека Израел врши контролирани масакри врз палестинскиот народ уште од 1948 година, користејќи различни нехумани методи како присилна миграција, ограничување, ембарго, притисок, малтретирање и масакр, во декларацијата се наведува: „Израел долги години е во позиција на окупатор во регионот и слично како во минатото, и деновиве врши дејности на притисок и насилство врз муслиманското население во Палестина, првенствено во Газа. Нападите на Израел во кои цел се цивили, меѓу кои значителен дел се жени и деца, кулминираа со бомбардирањето на баптистичката болница Ал Ахил, акт кој е неприфатлив за човештвото. Ние, како поединци со хумана свест, не можеме да останеме неми пред ова злосторство.“

Во декларацијата се истакнува дека меѓународната заедница, особено Обединетите нации (ОН), само го набљудуваат израелско-палестинскиот судир и не преземаат никакви мерки на претпазливост против масакрот извршен врз невините луѓе во кој досега животот го загубија повеќе од 3.500 Палестинци, главно деца.

„Овој амбивалентен став на меѓународната заедница, која останува слепа пред систематското долгогодишно кршење на човековите права на угнетеното палестинско население, во ниту еден случај не го одразува нашето мислење, на совесните граѓани на Северна Македонија. Затоа, во оваа прилика, апелираме веднаш да се преземат чекори за да престанат овие напади кои брутално го газат човечкото достоинство. Би сакале да потенцираме дека како заедници на овој регион кои беа изложени на низа масакри и геноциди кон крајот на 20 век, се солидаризираме со нашите браќа и сестри од Палестина“, се вели во декларацијата.

Во продолжение се наведено дека палестинското прашање продолжува упорно да се игнорира, иако е тоа прашање за достоинство на целиот свет, на глобалното владеење и безбедносниот поредок и на сите институции со одговорност и авторитет. Се истакнува дека е потребно, особено за земјите од регионот, што поскоро да се преземат чекори за воспоставување мир и просперитет.

Во декларацијата се наведува дека САД, Европа и земјите од регионот се повикани да усвојат став заснован врз правичен, рамноправен и хуман баланс меѓу страните.

„Овие нечовечки политики на Израел се најостро осудени од сите страни на општеството. Секое разбирање кое го поддржува злосторството и злосторникот неминовно ќе го снема. Без разлика на сѐ, ние сме покрај угнетениот палестински народ“, се вели на крајот од декларацијата.

Платформата за поддршка на Палестина е платформа формирана од здруженија на различни националности во Северна Македонија.