Ekipa
17 Март 2025•Ажурирај: 19 Март 2025
ГАЗА (АА) - Појасот Газа се соочува со тешка криза со отпадот, при што сметот се натрупува на улиците и во станбените зони поради колапсот на општинските услуги, јавува Анадолу.
Разурнувањата на инфраструктурата од континуираните израелски напади ги оставија санитарните системи нефункционални, создавајќи опасни услови за живот на жителите на градот.
Портпаролот на Општина Газа, Хусни Махна, предупреди дека градот се соочува со „здравствена и еколошка катастрофа“, бидејќи општината се бори да го транспортира отпадот до главната депонија во Џухр ал-Дик.
Според неговите зборови, израелските сили уништиле 133 камиони за собирање смет за време на војната – што претставува 80 отсто од градските возила – оставајќи ги властите немоќни да ги исчистат улиците.
Дополнително, Израел им го блокираше пристапот на општинските работници до депонијата, што ја влошува кризата, особено со враќањето на раселените жители и зголемувањето на количината на отпад.
Големите локации за одлагање отпад во централна Газа, како депонијата Фарас и станицата Јармук, се претвораат во жаришта за ширење болести, вклучувајќи колера и тифус.
Општината апелира до меѓународните организации и спонзорите на примирјето да извршат притисок врз Израел за да дозволи влез на нови возила за собирање отпад и да им овозможи на работниците пристап до депонијата.
„Само тогаш работниците ќе можат да го префрлат натрупаниот отпад од централна Газа на предвидените локации и да ја ублажат тековната еколошка и здравствена криза предизвикана од ова натрупување“, објасни портпаролот.
Прекинот на огнот беше воспоставен во Газа на 19 јануари, со што беше запрена геноцидната војна на Израел, која одзеде повеќе од 48.200 палестински животи, најголем дел жени и деца, оставајќи ја енклавата во урнатини.
Израел ја претвори Газа во најголемиот „отворен затвор“ во светот, одржувајќи 18-годишна блокада и принудувајќи речиси 2 милиони од 2,3 милиони жители на раселување, додека војната создаде недостиг од храна, вода и лекови поради намерните ограничувања.
