Alperen Aktaş
08 Ноември 2024•Ажурирај: 09 Ноември 2024
ПАРИЗ (АА) - Поддржувачите на Палестина во Франција ги повикаа властите синоќа да ја откажат галата закажана за 13 ноември во Париз, каде што треба да се појави израелскиот министер за финансии Безалел Смотрич, јавува Анадолу.
Тие се собраа на плоштадот Трокадеро во близина на Ајфеловата кула во главниот град, барајќи француските власти да ја спречат галата организирана од фондацијата „Израел засекогаш“.
Демонстрантите извикуваа слогани како „Нема гала во Париз за Смотрич и неговите соработници“ и „Да живее палестинскиот отпор“ во знак на протест за настанот.
На протестот беа истакнати палестински и либански знамиња, како и транспаренти на кои пишуваше „Западот е одговорен за геноцидот во Газа“ и „Убиецот Смотрич“.
На демонстрациите им се придружија и француски политичари, антиционистички еврејски граѓански групи и рабини.
Еврејски рабин држеше транспарент на кој пишуваше „Вистинските рабини отсекогаш се противеле на ционизмот и на државата Израел“.
Минатиот месец Томас Портес, пратеник од опозициската партија Непокорена Франција, поднесе официјално барање до париската полиција да го откаже учеството на Смотрич на галата.
На 4 ноември шест организации, вклучително и Француската лига за човекови права, објавија заедничка изјава повикувајќи на откажување на настанот.
