ЛОНДОН (АА) - Тим за отстранување бомби беше распореден денес на аеродромот „Гетвик“ во Лондон, откако голем дел од неговиот јужен терминал беше евакуиран по откривањето „сомнителен забранет предмет во багаж“, соопшти полицијата денес, јавува Анадолу.

„Гетвик“ соопшти дека голем дел од јужниот терминал бил евакуиран како мерка на претпазливост додека продолжуваат да го истражуваат безбедносниот инцидентот.

„Патниците нема да можат да влезат во јужниот терминал додека ова е во тек. Безбедноста на сите патници и на персоналот останува највисок приоритет“, објави аеродромот на социјалната мрежа Х.

Полицијата во Сасекс соопшти дека тимот за отстранување бомби бил распореден на аеродромот откако бил откриен сомнителен забранет предмет во багаж.

Инцидентот се случува по контролираната експлозија во близина на американската Амбасада во Лондон, откако рано утринава во областа беше пронајден сомнителен пакет.