Еден убиен, повеќемина повредени кога израелските војници пукаа врз Палестинци кои земаа хуманитарна помош во Газа

ГАЗА (АА) - Еден Палестинец е убиен, а неколку други беа повредени откако израелските војници отвориле оган врз толпа луѓе кои се обидувале да добијат хуманитарна помош во областа Заким, во северниот дел на Појасот Газа, соопштија очевидци и здравствените власти, јавува Анадолу.

Илјадници Палестинци се собраа во областа во обид да дојдат до храна, во услови на тешка хуманитарна криза и акутен недостиг на основни прехранбени производи низ целата енклава.

Сведоците велат дека пукотниците се слушнале откако граѓаните почнале да носат вреќи со брашно од камионите со помош.

Повредените и убиените се пренесени во болницата Шифа во градот Газа.

Во Појасот Газа, израелската Армија води жестока офанзива од октомври 2023 година.

Според последните бројки, речиси 56.000 Палестинци се убиени, од кои најголем дел се жени и деца.

Во ноември минатата година, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант, поради воени злосторства и злосторства против човештвото извршени во Газа.