РИМ (АА) - Премиерката на Италија, Џорџија Мелони, му ја нагласи на израелскиот претседател Исак Херцог важноста на одржувањето на прекинот на огнот во Газа, известува Анадолу.

Мелони во премиерската палата Чиги во Рим се сретна со Херцог, кој престојува во официјална посета на Италија.

Во соопштението што го објави Канцеларијата на премиерката во врска со средбата на Мелони со Херцог се вели:

„Премиерката Мелони уште еднаш ја нагласи важноста на одржувањето на договорот за прекин на огнот во Газа. Овој договор овозможи ослободување на некои заложници и значително зголемување на хуманитарната помош во Појасот Газа, во што Италија, исто така, е во првите редови преку својата иницијатива 'Храна за Газа'.“

Наведувајќи дека премиерката Мелони ја повторила посветеноста на Италија на стабилизацијата и обновата на Газа и ја истакнала неопходноста од воспоставување политички хоризонт за постигнување праведен и траен мир во регионот, во соопштението се додава:

„Слична желба беше изразена и за прекинот на огнот постигнат во Либан, каде што Италија одигра ненадминлива улога преку мисијата на Привремените мировни сили на Обединетите нации во Либан (УНИФИЛ).“

Во соопштението се истакнува заедничката волја за продлабочување на билатералното партнерство меѓу двете земји во сите подрачја, особено во областа на енергетиката, науката и технологијата.

Во меѓувреме, на улиците и плоштадите во главниот град беа преземени опсежни безбедносни мерки поради посетата на Херцог.

Херцог го посети Рим и во јули 2024 година, кога имаше протести против него.