Казахстан ја разгледува опцијата да купи турски оклопни возила за Командата на специјалните сили

АСТАНА (АА) - Казахстан соопшти дека ја разгледува опцијата за купување оклопни борбени возила од турско производство за новоформираната Команда на специјалните сили во рамките на Вооружените сили на Казахстан, јавува Агенција Анадолија (АА).

Султан Камалетдинов, заменик-министер за одбрана на Казахстан, на прес-конференцијата што ја одржа во главниот град Астана, информира за реформите во Армијата.

Камалетдинов истакна дека со указ на претседателот Касим Џомерт Токаев, во јануари е формирана Командата на специјалните сили во рамките на Вооружените сили на Казахстан и додаде дека војниците распоредени во споменатата единица поминале специјална обука, а се вложуваат напори да се опремат со оружје и друга опрема.

Во овој контекст, говорејќи дека прават проценка на оклопните борбени возила произведени од турската компанија, Камалетдинов истакна: „Мора да ни е јасно дека секоја воена опрема е дизајнирана за извршување конкретни задачи. Ги имаме упатствата и документите на оклопните возила произведени од турската компанија. Тие се купени од страна на неколку земји. Од таа причина се испробани во вооружени конфликти.“

Истакнувајќи дека во својот состав Армијата на Казахстан има и беспилотни летала од израелско и кинеско производство, Камалетдинов рече: „Сега планираме да купиме турски беспилотни летала, чие производство ќе го организираме во нашата земја.“

Претходно беше соопштено дека турската компанија „Отокар“ има за цел да произведува оклопни борбени возила во Казахстан.