Dilan Pamuk
05 Јануари 2022•Ажурирај: 05 Јануари 2022
АНКАРА
Казахстанскиот претседател Касим-Јомарт Токаев денеска ја прифати оставката на Владата со претседателски декрет, откако бран масовни протести ја зафатија земјата поради зголемувањето на цените на течниот нафтен гас, пренесува Агенција Анадолија (АА).
„Во согласност со член 70 на Република Казахстан, одлучувам да ја прифатам оставката на Владата на Република Казахстан“, изјави Токаев во декретот.
„Според декретот, првиот вицепремиер Алихан Смаилов е назначен за привремен премиер“, објави рускиот медиум РТ. Иако декретот стапува во сила веднаш, се очекува членовите на Кабинетот да ги продолжат своите должности до формирање на нова влада.
Како што протестите се проширија низ целата земја претходно истиот ден, Токаев прогласи вонредна состојба во градот Алмати и во регионот Мангистау, богат со нафта на запад, во периодот меѓу 5 и 19 јануари, за да ја одржи јавната безбедност. Тој, исто така, воведе полициски час во Алмати, поранешниот главен град на земјата, каде што илјадници луѓе излегоа на улиците.
Полицијата употреби шок-бомби и солзавец за да ги разбрка демонстрантите, на што тие одговорија со камења. Пријавени се и судири меѓу полицијата и демонстрантите, како и вандализирање и палење на полициски автомобили од страна на демонстрантите.
Владата, исто така, го ограничи пристапот до апликациите на социјалните медиуми, вклучително и Фејсбук и Телеграм.
Протестите избија на 2 јануари кога возачите одржаа протести против зголемувањето на цените на течниот нафтен гас во градот Жанаозен во Мангистау, кои подоцна се проширија во градот Актау.
Протестите за поддршка во западните градови Атирау, Актобе и Орал, каде што се наоѓаат резервите на нафта и природен гас во земјата, се проширија и во другите делови на Казахстан, при што се претворија во јавни демонстрации.
