Saadet Gökce
18 Декември 2025•Ажурирај: 18 Декември 2025
ИСТАНБУЛ (АА) – Камбоџа денес соопшти дека Тајланд извршил нови воздушни напади со борбени авиони Ф-16 во провинцијата Преах Вихеар, пренесува Анадолу.
Тајландските авиони утринава ги бомбардирале областите Пном Кмоч и Пик Сбеак, објави локалниот медиум „Фреш њуз“, повикувајќи се на Министерството за одбрана на Камбоџа.
„Камбоџанските сили ќе продолжат да го штитат територијалниот интегритет и националното достоинство на Камбоџа со непоколеблива решителност“, соопшти Министерството.
Кралската тајландска армија, исто така денес соопшти дека од повторното разгорување на конфликтот на 7 декември уништила повеќе од шест објекти што ги користеле транснационални измамнички мрежи, меѓу кои казина и хотели, пренесе локалниот информативен портал „Нејшн“.
Синоќа, камбоџанските медиуми јавија дека на границата владее релативен мир.
Во меѓувреме, специјален кинески пратеник за азиски прашања ќе започне „шатл-дипломатска посета на Камбоџа и Тајланд со цел да се приближат двете страни и што побрзо да се обнови мирот“, соопштија извори денес.
Од почетокот на конфликтот пред 12 дена, на двете страни загинале најмалку 55 лица.
Според тајландските власти, убиени се 21 тајландски војник и 16 цивили. Камбоџанското Министерство за внатрешни работи соопшти дека загинале 18 камбоџански цивили, а 78 се повредени.
Судирите продолжија и покрај изјавата на американскиот претседател Доналд Трамп во петокот дека лидерите на Тајланд и Камбоџа се согласиле да ги запрат обновените борби.
Двете земји во октомври потпишаа мировен договор во Куала Лумпур, во присуство на Трамп и малезискиот премиер Анвар Ибрахим, но договорот подоцна беше суспендиран откако тајландски војници беа тешко повредени во експлозија на нагазна мина во погранична провинција.
Тајландските власти соопштија и дека околу 18 камбоџански војници остануваат во тајландски притвор по инцидентите во изминатите пет месеци.
Тајланд и Камбоџа имаат долгогодишен граничен спор кој повеќепати ескалирал во насилство, вклучително и судирите во јули, кога загинаа најмалку 48 лица.
