Кина ги отфрли предлозите за воведување санкции кон Авганистан

АНКАРА

Кина денес ги отфрли предлозите за воведување санкции кон Авганистан, откако поголемиот дел од земјата беше заземен од талибанците на почетокот на овој месец, јавува Агенција Анадолија (АА).

„Светот треба да му помогне на Авганистан да се обнови мирно и да ја зголеми способноста за независен развој. Воведувањето санкции врз Авганистан нема да реши ништо, туку може да заврши лошо“, рече Ванг Венбин, портпаролот на кинеското Министерство за надворешни работи, на прес-конференцијата во Пекинг.

Соопштението од Пекинг следува по извештаите дека Велика Британија може да ги поттикне лидерите на Г7 да „разгледаат нови санкции“ против талибанците. Лидерите на Г7 денеска треба да одржат виртуелен состанок на кој ќе разговараат за падот на поранешниот авганистански претседател Ашраф Гани и неговата администрација во време на заземањето на главниот град Кабул од страна на талибанците.

Кина ги критикуваше САД поради „брзото повлекување“ од земјата зафатена од војна, но се чини дека е подготвена да ја поздрави новата влада во Авганистан, инсистирајќи таа да биде „инклузивна“.

Според кинескиот дневен весник „Глобал тајмс“, „Меѓународната заедница треба да внимава да не интервенира повторно воено во Авганистан, користејќи ја маската на демократијата“, рекол Ванг Венбин, додавајќи дека „не треба да дозволат некои земји да прават грешки“, додека дозволуваат авганистанскиот народ и другите земји од регионот да ја платат сметката“.

- Талибанците ја поканија Јапонија за реконструкција на Авганистан

Претходно денес, талибанците ја поканија Јапонија да помогне во реконструкцијата на Авганистан, а групата рече дека сака „добри односи“ меѓу Кабул и Токио.

„Сакаме Јапонија да учествува во реконструкцијата на Авганистан. Имаме намера да имаме добри односи со нив“, изјави портпаролот на талибанците, Сухаил Шахин, во интервју за „Кјодо њуз“ со седиште во Токио.

„Талибанците бараат јапонска 'соработка во различни области' во Авганистан“, рече Шахин.

Јапонија е една од најголемите даватели на помош за Авганистан што е разурнат од војна и е сведок на политичка трансформација откако талибанците ја вратија контролата врз земјата по борбата со странските сили предводени од САД во последните две децении.

Токио придонесе со над 6 милијарди долари за реконструкција, образованието, земјоделството, здравствената заштита и другите програми за помош на земјата од 2001 година.

Сепак, Јапонија ја затвори својата амбасада во Кабул на 15 август и во моментов е во процес на евакуација на својот персонал заедно со локалните вработени.

Портпаролот на талибанците рече дека се надева дека Јапонија „наскоро ќе ја отвори својата амбасада во Авганистан“.

Шахин ја повтори амнестијата за сите оние што претходно работеа за режимот на Кабул, поддржан од Западот, предводен од поранешниот претседател Ашраф Гани, кој ја напушти земјата пред талибанците да влезат во главниот град.

„Ние, сите Авганистанци, треба да се собереме за обнова на нашата земја и рехабилитација. Никој не е на нишан како поддржувач на напаѓачите и соработниците на САД и другите“, тврди Шахин.

Вчера, талибанците ја поканија Јужна Кореја „заемно да извлечат корист“ од неискористените минерални полиња на земјата зафатена од војна, додека групата се обидува да ги зајакне економските врски со источноазиската нација, позната по својата електронска индустрија.

„Авганистан е преполн со неискористени минерални ресурси. Кореја како водечки светски производител на електроника може да работи со нашата земја врз основа на заемни интереси, каде што исто така може да послужи како економски коридор што ги поврзува земјите од Јужна и Централна Азија“, изјави Абдул Кахар Балкхи, член на талибанската културна комисија, во интервју за јужнокорејската новинска агенција „Јонхап“.

Претходно, талибанците исто така повикаа на кинески инвестиции во земјата.