Кина одржува воздушни и поморски вежби околу Тајван

ИСТАНБУЛ (АА) - Kина откри дека нејзините воени сили одржале воени вежби преку Тајванскиот Теснец во периодот од петокот до вчера, пренесува Агенција Анадолија (АА).

Во кусото соопштение на Министерството за одбрана на земјата се вели дека поморските, воздушните и конвенционалните ракетни сили на Источната театарска команда на Кинеската народна ослободителна армија одржале вежби во морињата и воздушниот простор на исток и југозапад од Тајван од 6 до 8 мај.

Министерството соопшти дека вежбите имале за цел „да ја тестираат и подобрат заедничката оперативна способност на повеќе служби и оружје“.

Најновите воени вежби доаѓаат во време на засилени воздушни активности на кинеските сили околу Тајван, кој Пекинг го смета за своја „отцепена провинција“. Тајпеј, сепак, инсистира на својата независност од 1949 година.

Тајванското Министерство за одбрана соопшти дека седум кинески воени авиони влегле во нивната зона за идентификација на воздушната одбрана (ADIZ) во текот на викендот.

Ова се случи откако 18 кинески воени авиони ја пробија АДИЗ - тампон-зона надвор од воздушниот простор на една земја во којашто има право да побара од авионите што влегуваат да се идентификуваат.

Тензиите меѓу Пекинг и Тајпеј ескалираа од октомври минатата година кога Кина ја прослави годишнината од основањето, а во деновите што следуваа, голем број кинески воени авиони влетаа во АДИЗ.

Набљудувачите внимателно ги следат потезите на Кина во Тајванскиот Теснец во време на руската војна против Украина, додека САД ги зголемија своите ангажмани со Тајпеј, испраќајќи неколку официјални делегации во островската држава со која немаат дипломатски односи.

Тајпеј е гласен во својата поддршка за Украина и исто така воведе трговски санкции кон Русија и нејзиниот близок сојузник Белорусија.