Mücahithan Avcıoğlu
25 Декември 2025•Ажурирај: 26 Декември 2025
ИСТАНБУЛ (AA) – Кина денес соопшти дека се надева оти компаниите ќе успеат да постигнат решенија кои се во согласност со кинеските закони и регулативи и кои одразуваат „избалансирана разгледаност“ на интересите, по договорот со кој американските операции на ТикТок ќе преминат под контрола на САД, јавува Анадолу.
Портпаролката на Министерството за трговија на Кина, Хе Јонгќјан, на прес-конференција изјави дека, со цел спроведување на „важниот консензус“ постигнат за време на телефонскиот разговор меѓу двајцата шефови на држави, економските и трговските тимови на двете земји претходно постигнале основна рамка на договор за соодветно решавање на прашања како што е TикТок, преку соработка заснована на заемно почитување и еднакви консултации.
Таа изрази надеж дека САД ќе работат во иста насока со Кина, искрено ќе ги исполнат релевантните обврски, ќе обезбедат „фер, отворена, транспарентна и недискриминаторска“ деловна средина за кинеските компании со цел тие да можат стабилно да оперираат во САД, како и дека ќе го поддржат „стабилниот, здрав и одржлив“ развој на билатералните трговски и економски односи.
Минатата недела ТикТок потпиша договор за продажба на своите американски операции на ново заедничко претпријатие предводено од американски компании, во кое учествува и технолошкиот гигант Оракл, во обид да се обезбеди иднината на апликацијата во САД.
Трансакцијата следуваше како одговор на американскиот закон усвоен минатата година, со кој се бара од БајтДенс, кинеската матична компанија на ТикТок, да отуѓи 80 проценти од своите средства во САД или да се соочи со целосна забрана на апликацијата на национално ниво.
