Кратко предупредување од американскиот претседател до Иран за евентуален напад врз Израел: „Немојте!“

ВАШИНГТОН (АА) - Американскиот претседател Џо Бајден синоќа повторно го предупреди Иран за евентуален одмазднички напад врз Израел поради зголемените тензии на Блискиот Исток, јавува Анадолу.

„Немојте!“, им одговори Бајден на новинарите пред да влезе во своето возило, кога го прашаа: „Која е вашата порака до Иран?“

Бајден го даде истото предупредување во април, пред Иран да изврши ракетен и напад со дрон врз Израел како одмазда за воздушниот напад на 1-ви април врз неговиот дипломатски објект во сирискиот главен град Дамаск, при што беа убиени најмалку седум припадници на иранскиот Корпус на Исламската револуционерна гарда, меѓу кои двајца високи генерали.

Тензиите на Блискиот Исток растат по атентатот на политичкиот шеф на Хамас, Исмаил Ханије, на 31 јули во иранската престолнина Техеран и израелското убиство на високиот командант на Хезболах, Фуад Шукр, во Бејрут.

Хамас и Иран го обвинија Израел за извршување на атентатот врз Ханије, додека Тел Авив ниту ја потврди, ниту ја негираше одговорноста.

Иран вети „строга казна“ за Израел за убиството на Ханије на иранска територија.

Либанската група Хезболах, исто така, се очекува да се одмазди откако Израел го уби Шукр во воздушен напад врз јужно предградие на Бејрут на 30 јули.

Ескалацијата доаѓа во време на тековната израелска офанзива врз Појасот Газа во која досега загинаа речиси 39.800 Палестинци, по нападот на 7 октомври минатата година од страна на палестинската група на отпорот Хамас, во кој загинаа 1.139 Израелци.