Над 50 уапсени на протестите против Бајден во Њујорк

ЊУЈОРК (АА) - Околу 50 демонстранти се уапсени во Њујорк додека го повикуваа американскиот претседател Џо Бајден да престане да ја поддржува израелската Влада и нејзините воени операции во Газа, јавува Анадолу.

Собрани во Рокфелер-центарот на Менхетен во обид да го попречат снимањето на интервјуто на Бајден за емисијата „Доцна вечер со Сет Мејерс“ на Ен-би-си, демонстрантите извикуваа „Бајден, Бајден, не можеш да се скриеш, финансираш геноцид“ и „Прекинете со опсадата на Газа веднаш“.

Демонстрантите виореа транспаренти со натписите „Слободна Палестина“, „Евреите до Бајден: Престанете со вооружување на геноцид“ и „Целиот свет гледа“.

Бајден ненајавено ја посети блиската слаткарница, каде што на новинарите им рече дека се надева дека до 4 март ќе биде постигнат прекин на огнот во Појасот Газа.

„Се надевам до крајот на викендот... Мојот советник за национална безбедност ми кажа дека сме блиску. Блиску сме. Сè уште не сме готови. Се надевам дека ќе имаме прекин на огнот до следниот понеделник“, рече Бајден.

Израел започна смртоносна офанзива врз Појасот Газа по прекуграничниот напад на палестинската група Хамас во октомври, во која досега загинаа најмалку 29.878 Палестинци.

Според Обединетите нации, поради израелската офанзива врз Газа, 85 отсто од населението на енклавата е внатрешно раселено, а 60 отсто од инфраструктурата е оштетена или уништена.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за да се гарантира хуманитарна помош за цивилите во Газа.