Најмалку 18 лица загинаа во напади на жени-самоубијци во Нигерија

МАЈДУГУРИ (АА) - Најмалку 18 лица загинаа, а 30 се повредени, од кои 19 тешко, за кои постои сомневање дека претставуваат координирани напади на жени-бомбаши самоубијци извршени денес во североисточниот нигериски град Гвоза, објавија локалните власти, пренесува Анадолу.

Баркиндо Саиду, генералниот директор на државната агенција за вонредни состојби во Борно, за новинарите изјави дека првата експлозивна направа била активирана за време на свадбена прослава околу 15 часот.

„Неколку минути подоцна се случила уште една експлозија во близина на Општата болница“, рече Саиду.

Третиот напад бил извршен за време на погреб на кој жената бомбаш-самоубиец била преправена во ожалостена. Меѓу убиените има деца и трудница.

Засега никој не ја презеде одговорноста за нападите во градот Гвоза, сместен во државата Борно. Оваа нигериска држава беше тешко погодена од бунтот во 2009 година започнат од екстремистичка група Боко Харам.