Полицијата го откри идентитетот на третиот напаѓач од Лондон

ЛОНДОН (АА) - Британската полиција го соопшти идентитетот на третиот напаѓач од Лондонскиот мост, а станува збор за 22-годишниот Јусеф Загхба, јавува Anadolu Agency (AA).

Од Скотланд Јард потврдија дека Загхба е третиот напаѓач, покрај Курам Шазад Бат (27) и Рашид Редоне (30) чии идентитети беа откриени многу порано.

Од таму истакнаа дека Загхба е италијански државјанин со мароканско потекло и дека не е на листата на следење од внатрешната разузнавачка агенција МИ5.

Курам Шазад Бат е британски државјанин роден во Пакистан, а се верува дека Редоне е роден во Мароко или во Либија.

Потсетуваме, најмалку седум лица загинаа, а 48 беа повредени во саботниот терористички напад што се случи во центарот на Лондон.

Нападот се случи кога напаѓачите со комбе влетаа во пешаци на Лондонскиот мост, а потоа напуштајќи го возилото, со ножеви ги нападнаа луѓето на пазарот Бороу, каде што полицијата успеа да ги убие сите тројца напаѓачи.

Полицијата го опиша нападот како терористички и приведе 12 осомничени кои подоцна беа ослободени.

Одговорноста за нападот ја презеде терористичката организација ДЕАШ.