Протести на ривалски групи поради убиството на германскиот државјанин

БЕРЛИН (АА) - Крајно десничарски и антифашистички групи се судрија во источниот германски град Кемниц поради убиството на едно лице од страна на мигранти, јавува Anadolu Agency (AA).

Над 4.500 демонстранти, приврзаници на крајната десница, учествуваа на антимиграциските протести организирани од партијата Алтернатива за Германија (AfD) и групата „Pro Chemnitz“, една недела по убиството на германски граѓанин од страна на двајца мигранти при улична расправија.

Демонстрантите кои носеа слогани за итно депортирање на илегалните мигранти, извикуваа „Меркел мора да си замине“, „Отпор“ и „Ние сме народот“.

Левичарските и антифашистичките групи организираа контрадемонстрации, со цел да го изразат својот протест против насилството на крајните десничари во Кемниц, бидејќи во последните денови забележани се поголеми напади врз странци на улиците.

Според организаторите, на контрапротестите учествувале најмалку 3.500 лица.

На протестите имаше зајакнато присуство на полицијата, со цел да се избегнат поголеми судири на ривалските групи.

Сепак, во настанатите судири помеѓу крајно десничарските екстремисти и левичарските групи беа повредени најмалку 11 лица.