Путин: Ескалацијата на Блискиот Исток е јасен пример за неуспехот на американската политика во регионот

ИСТАНБУЛ (АА) - Рускиот претседател Владимир Путин изјави дека ескалацијата на ситуацијата на Блискиот Исток е јасен пример за неуспехот на американската политика во регионот, пренесува Анадолу.

„За жал, гледаме остра ескалација на ситуацијата на Блискиот Исток. Мислам дека многумина ќе се согласат со мене дека ова е јасен пример за неуспехот на политиката на Соединетите Американски Држави на Блискиот Исток“, изјави Путин на состанокот со ирачкиот премиер Мохамед Шија ал Судани во Москва.

Путин нагласи дека САД се обиделе да го монополизираат решението на израелско-палестинскиот конфликт и дека се фокусирани на промовирање на сопствените идеи и притисок врз двете страни, наместо да најдат прифатливи компромиси.

Тој исто така изјави дека Вашингтон со своите постапки не ги зел предвид темелните интереси на палестинскиот народ.

„Мислам, пред сè, на потребата од спроведување на одлуките на Советот за безбедност на ОН за создавање независна суверена палестинска држава“, додаде Путин.

САД долго време се залагаат за решение со две држави што ги вклучува Израел и Палестина.

Военото крило на Хамас, бригадите Ал-Касам, во саботата наутро започна сеопфатна операција наречена „Поплава Акса“. Илјадници ракети беа истрелани од Газа кон Израел, а вооружени групи влегоа во населените места во регионот.

Групата соопшти дека операцијата е одговор на израелските напади врз комплексот на џамијата Ал Акса во окупираниот Источен Кудс (Ерусалим) и зголеменото насилство од еврејските доселеници.

Бројот на Палестинци убиени од израелските сили во Газа се искачи на 770, меѓу кои деца и жени, соопшти Министерството за здравство со седиште во Газа. Се наведува дека бројот на ранети се искачил на околу 4.000.

Според израелското Министерство за здравство, најмалку 900 Израелци загинале, а повеќе од 2.600 се ранети.