Путин потпиша закон за оние кои ја дискредитираат руската војска

МОСКВА (АА) - Претседателот на Русија, Владимир Путин, денес го потпиша законот што Парламентот го усвои кон крајот на јануари, за одземање на имотот на оние лица кои ги „дискредитираат“ безбедносните сили, пренесува Анадолу.

Со Законот, објавен на порталот од Владата на Русија, се менува Кривичниот закон и се проширува листата на кривични дела за кои е можно да се предвиди одземање на имот, вклучувајќи и свесно ширење на лажни информации за руските безбедносни сили.

Законот се однесува на злосторствата сторени особено од себични причини и повикува на конфискација на пари, скапоцености или друг имот на осуденото лице поради стореното кривично дело или активности насочени против безбедноста на Русија.

Државната дума, долниот дом на Парламентот на Русија, едногласно го усвои законот во текот на седницата на 31 јануари во второто и третото читање.

Вјачеслав Володин, претседателот на Думата, на социјалната мрежа Телеграм објави дека „апсолутно мнозинство“ го поддржува казнувањето на оние кои „ги валкаат Русија, војниците и офицерите“ надвор од земјата, како и оние кои ја поддржуваат и финансираат Украина.

„Усвоената одлука овозможува казнување на оние кои се занимаваат со активности против нашата земја“, рече Володин и додаде дека ќе им бидат одземени почесните звања, имот, пари и други вредности во Русија.