Elena Teslova
11 Април 2023•Ажурирај: 12 Април 2023
МОСКВА (АА) - Вулканот Шивелуч на рускиот полуостров Камчатка еруптираше рано утринава и исфрли облак од пепел висок до 20 километри, пренесува Анадолу.
„Ерупцијата на вулканот Шивелуч продолжува. Според сателитските податоци, тој исфрли уште еден облак од пепел, чија висина е околу 12 илјади метри надморска височина“, соопшти Обединетата геофизичка служба на Руската академија на науките.
Според податоците на службата, досега се забележани четири максимални фази на ерупција, максималната висина на облакот од пепел над вулканот Шивелуч достигна 20 километри надморска височина, а облакот од пепел се прошири до 400 километри.
Подрачјето во близина на вулканот е ненаселено, но некои луѓе настрадаа од вулканската пепел, која ветерот ја разнесе во населените подрачја. Властите затворија некои автопати во близина на вулканот и предупредија на опасноста што ерупцијата може да ја претставува за воздушниот сообраќај во областа.
Шивелуч, висок 3.283 метри, е еден од најголемите и најактивните вулкани на Камчатка. Вулканот имал околу 60 значајни ерупции во последните 10.000 години, а последната голема ерупција се случила во 2007 година.
