Русија тврди дека Украина се обидела да нападне патролни бродови на нејзината Црноморска флота

АНКАРА (АА) - Русија ја обвини Украина дека вчера со пловило без екипаж се обидела да нападне руски патролни бродови на Црноморската флота, пренесува Анадолу.

„Во 22:55 часот Вооружените сили на Украина имаа неуспешен обид за напад на бродовите на Црноморската флота што извршуваа задача за контролирање на пловидбата во југозападниот дел на Црно Море, 237 километри југозападно од Севастопол, со пловило без екипаж“, се вели во соопштението на руското Министерство за одбрана.

Пловилото не успеало да ја постигне целта и брзо било спречено од руските сили, се вели во соопштението.

Чамецот без екипаж бил неутрализиран со истрелан оган од Црноморската флота, вклучително и патролните бродови „Питливи“ и „Васили Биков“.

По инцидентот, бродовите на Црноморската флота ги продолжиле своите должности за навигациска контрола.

Украинските власти сѐ уште не ги коментираа тврдењата.