Рускиот Парламент гласаше за признавање на отцепените украински региони

МОСКВА (АА) - Долниот дом на рускиот парламент, Државната дума, денес гласаше за признавање на отцепените украински региони Доњецк и Луганск како независни држави, јавува Агенција Анадолија (АА).

Во јануари, Комунистичката партија на Русија достави предлог за барање до претседателот Владимир Путин да го разгледа признавањето на двата региони.

По неколку рунди дискусии, предлогот беше претставен пред пратениците, за кој 351 гласаа за, 16 против и еден воздржан.

Вјачеслав Володин, претседател на Државната дума, рече дека прашањето за признавање е поттикнато од потребата да се осигури безбедноста на руските државјани што живеат во Доњецк и Луганск.

Сепак, министерот за надворешни работи, Сергеј Лавров, рече дека самопрогласените републики се откажале од обидот за отцепување од Украина според Договорот од Минск.

Коментирајќи ја иницијативата на Државната дума, портпаролот на Кремљ, Дмитриј Песков, рече дека Русија останува посветена на Договорот од Минск и го поддржува спроведувањето на договорот „што е можно поскоро“.

За Украина, министерот за надворешни работи Дмитро Кулеба рече дека признавањето на Доњецк и Луганск ќе значи крај на Договорот од Минск со сите поврзани последици.

Минатата година, украинскиот претседател Владимир Зеленски ја обвини Русија дека распоредила над 100.000 војници на границата со Украина.

Руските власти постојано ги негираа обвинувањата, критикувајќи ги како „кампања за дезинформација“ и „лажни вести“ кои имаат за цел да ги поткопаат предлозите на Москва за безбедносни гаранции.