СЗО соопшти дека 57 деца починале од последици од неисхранетост во Газа од 2 март

ЖЕНЕВА (АА) - Најмалку 57 деца во Газа починале од последиците на неисхранетост од почетокот на блокадата на хуманитарната помош на 2 март, соопшти Светската здравствена организација (СЗО) денес, повикувајќи се на податоци од палестинското Министерство за здравство, јавува Анадолу.

На прес-конференција на Обединетите нации во Женева, претставникот на СЗО за Западниот Брег и Газа, Ричард Пеперкорн, ја опиша ситуацијата како „една од најлошите кризи со глад во светот“, предизвикана од „намерно попречување“ на доставата на хуманитарна помош, вклучително и храна и медицински материјали.

Според најновата анализа на Класификацијата на фази за безбедност на храната (IPC), целото население на Газа – околу 2,1 милион луѓе – се наоѓа под „критичен ризик од глад“, по 19 месеци војна, раселување и ограничувања на помошта.

Во периодот од 1 април до 10 мај, 93 отсто од населението, односно 1,95 милиони жители на Газа, биле класифицирани во фаза 3 или повисока, што означува „криза или полошо“.

Меѓу нив, 244.000 луѓе се наоѓаат во фаза 5 (катастрофа), а 925.000 во фаза 4 (вонредна состојба).

„Доколку состојбата продолжи, се предвидува дека речиси 71.000 деца под петгодишна возраст ќе бидат акутно неисхранети во следните единаесет месеци“, изјави Пеперкорн.

Исто така, речиси 17.000 бремени и доилки се изложени на сериозен ризик.

Пеперкорн нагласи дека населението во Газа е заробено во „опасен циклус“ во кој неисхранетоста го ослабува имунитетот, болестите брзо се шират поради недостаток на чиста вода и санитарни услови, а пристапот до здравствена заштита е речиси невозможен.

Покриеноста со вакцини е во драматичен пад, а ризиците за децата значително се зголемуваат.

„Без доволно храна, чиста вода и здравствена заштита, цела генерација ќе биде трајно погодена“, предупреди Пеперкорн, наведувајќи застој во растот, нарушен развој на мозокот и хронични здравствени проблеми како потенцијални последици.

Претставникот рече дека се бори да ја одржи поддршката за 19 центри за третман на неисхранетост поради намалување на залихите. Моменталните залихи во Газа можат да лекуваат само 500 деца - „мал“ дел од итната потреба.

Тој повторно упати апел за итно укинување на блокадата, заштита на здравствениот систем, ослободување на сите заложници и постигнување прекин на огнот што ќе доведе до траен мир.

Од почетокот на израелската офанзива во октомври 2023 година, во Газа се убиени речиси 52.900 Палестинци, поголемиот дел од нив жени и деца.