Силен земјотрес со јачина од 6,1 степен според Рихтер ја погоди Индонезија

АНКАРА (АА) - Земјотрес со јачина од 6,1 степен според Рихтеровата скала ја погоди денеска Индонезија, соопшти Американскиот геолошки институт, јавува Анадолу.

На длабочина од 588 километри, епицентарот на земјотресот бил во Банда Море, околу 262 километри од градот Баубау во југоисточната провинција Сулавеси.

Нема информации за загуби или предупредување за цунами.

Индонезија доживува чести земјотреси бидејќи се наоѓа во пацифичкиот „Огнен прстен“, тектонски појас од вулкани и земјотреси.

Земјотрес со јачина од 6,2 степени според Рихтеровата скала го погоди островот Сулавеси во јануари 2021 година, при што загинаа над 100 луѓе, а илјадници останаа без покрив над главата.

Околу 2.200 луѓе загинаа во друг земјотрес со јачина од 7,5 степени и последователното цунами во 2018 година.