Трамп ги нарече американските напади во Нигерија „божиќен подарок“ за терористичката ДЕАШ

ИСТАНБУЛ (АА) — Американскиот претседател Доналд Трамп денес ги нарече нападите врз позиции на ДЕАШ во Нигерија „божиќен подарок“ за терористичката организација, пренесува Анадолу.

„Десетици илјади христијани“ се убиваат во Нигерија, рече Трамп на радио „Даблју-еј-би-си“ (WABC), додавајќи дека ја предупредил нигериската Влада за последиците.

„Вчера реков: 'Нападнете ги на Божиќ. Тоа ќе биде божиќен подарок'“, рече Трамп.

Тој истакна дека американските сили ја нападнале ДЕАШ „силно“ на различни локации, нарекувајќи ја терористичката организација „ужасна“, а припадниците „касапи“.

„Тие навистина беа силно гаѓани вчера“, рече тој. „Добија многу лош божиќен подарок“.

„САД вчера извршија напади врз позиции на ДЕАШ во северозападна Нигерија“, објави Трамп на својата платформа за социјални медиуми „Трут сошал“.

Африканската команда на САД (AFRICOM) соопшти дека ги започнала нападите „на барање на нигериските власти“ во државата Сокото, „убивајќи повеќе терористи на ИСИС“, според објава преку американската компанија за социјални медиуми X.

Нигерија рано утрово потврди дека продолжува да соработува со САД по безбедносните прашања за справување со тековната закана од тероризмот и насилниот екстремизам.