Украина тврди дека досега во војната загинале 12.000 руски војници

ИСТАНБУЛ (АА) - Украина денеска излезе со тврдење дека во војната која трае 15 дена, Русија изгубила над 12.000 војници, како и тешко вооружување, меѓу кои 49 борбени авиони, 81 хеликоптер и 335 тенка, пренесува Агенција Анадолија (АА).

Споделувајќи ги информациите за вкупните воени загуби на Русија од 24 февруари до 10 март, украинскиот Генералштаб тврди дека загинале над 12.000 руски војници, уништени се 49 авиони на Руската армија, 81 хеликоптер, 335 тенка, 1.105 оклопни борбени возила, 123 артилериски системи, 56 повеќекратни ракетни системи за лансирање и 29 системи за противвоздушна одбрана.

„Дополнително, руските сили изгубија 526 возила, 3 чамци, 60 цистерни за гориво и 7 беспилотни летала на оперативно-тактичко ниво во Украина во последните 15 дена“, соопшти Генералштабот.

Во сведочењето оваа недела во американскиот Конгрес, разузнавачките службеници презентираа број на жртви многу помал од украинските бројки, со проценети 2.000 - 4.000 убиени руски војници.

Руската војна на Украина, која започна на 24 февруари, наиде на меѓународна осуда, доведе до финансиски санкции кон Москва и поттикна истапување на глобални компании од Русија.

Најмалку 516 цивили загинаа и 908 се повредени во Украина досега, според бројките на ОН, а се стравува дека бројката ќе биде поголема.

Повеќе од 2,1 милион луѓе досега ја напуштија Украина во соседните земји, според Агенцијата за бегалци на ОН.