Lina Altawell
16 Јануари 2026•Ажурирај: 19 Јануари 2026
ИСТАНБУЛ (AA) – Привремените сили на Обединетите нации во Либан (УНИФИЛ) денес соопштија дека дрон фрлил рачна бомба во близина на една од нивните патроли за време на планирана мисија во близина на јужнолибанскиот град Адеисе, јавува Анадолу.
УНИФИЛ на социјалната мрежа X соопшти дека мировниците спроведувале редовна патрола во близина на Адеисе, кога локални жители ги предупредиле за можна опасност во една куќа.
Патролата пронашла „експлозивна направа поврзана со детонаторска жица“ и воспоставила безбедносен периметар, се наведува во соопштението.
Додека мировниците се подготвувале да извршат проверка на уште една блиска куќа, „дрон кој летал над нив фрлил рачна бомба на оддалеченост од околу 30 метри од мировниците“, соопшти УНИФИЛ, додавајќи дека не е јасно дали бомбата експлодирала.
УНИФИЛ соопшти дека веднаш упатил барање за прекин на огнот до Израелските одбранбени сили (ИДФ), сметајќи ја израелската војска одговорна за „загрозување на животите на цивилите и мировниците“ преку своите активности на либанска територија.
„Овие дејствија претставуваат прекршување на резолуцијата 1701 на Советот за безбедност на ОН“, се наведува во соопштението, со предупредување дека секое однесување кое ги доведува во опасност мировниците „ја поткопува стабилноста во јужен Либан“.
УНИФИЛ беше воспоставен во 1978 година по израелската инвазија на јужен Либан, а неговиот мандат беше значително проширен по војната меѓу Израел и Хезболах во 2006 година, согласно со резолуцијата 1701.
Повеќе од 10.000 мировници беа распоредени со цел надгледување на прекинот на непријателствата и поддршка на присуството на либанската Армија јужно од реката Литани.
Резолуцијата 1701, усвоена во август 2006 година, повикува на прекин на непријателствата меѓу Израел и Хезболах и воспоставување зона без оружје меѓу т.н. Сина линија утврдена од ОН и реката Литани, освен за Либанските вооружени сили и УНИФИЛ.
Советот за безбедност на ОН во август 2025 година одлучи мандатот на УНИФИЛ да заврши на 31 декември 2026 година, по што ќе следува едногодишен план за постепено повлекување на силите.
Израел продолжи да го прекршува прекинот на огнот со Хезболах, што е на сила од крајот на ноември 2024 година, што резултираше со стотици жртви, додека израелските сили и понатаму се присутни на пет либански ридови.
