Vakkas Doğantekin
28 Септември 2022•Ажурирај: 29 Септември 2022
БАКУ (АА) – Вчера (вторник) заврши гласањето на референдумот во таканаречената Народна Република Доњецк (НРД), на којшто, според конечните резултати одобрени од Централната изборна комисија на НРД, 99,23 отсто од граѓаните избрале повторно припојување кон Русија, јави руската државна новинска агенција ТАСС, пренесува Агенција Анадолија (АА).
Пред објавувањето на конечниот резултат од преброените гласови, политичкиот шеф на ОН рече дека референдумите поддржани од Русија во окупираните територии на Украина не се вистински израз на волјата на народот, ниту се законски во рамките на меѓународното право.
„Едностраните дејствија кои имаат за цел да го направат легитимен обидот за стекнување преку сила територија на една држава од страна на друга, додека од друга страна тврди дека ја претставува волјата на народот, не можат да се сметаат за легални според меѓународното право“, рече Розмари ди Карло пред Советот за безбедност на Обединетите нации (ОН).
Украинскиот претседател Владимир Зеленски, исто така, ги критикуваше референдумите во своето обраќање на седницата на Советот за безбедност на ОН на која се приклучи преку видеолинк. Тој истакна дека Украина ќе продолжи да го брани својот народ во регионите кои гласаат за анексија.
„Околу 98,4 отсто од гласачите во украинскиот регион Лугањск, контролиран од сепаратистите, гласаа за припојување кон Русија“, изјави претседателот на Изборната комисија на таканаречената Лугањска Народна Република (ЛНР)
Леонид Пасечник, лидерот на самопрогласената република, ќе се обрати до рускиот претседател Владимир Путин со барање да размисли за припојување на регионот кон Русија.
Осумдесет и седум отсто од гласачите во украинскиот регион Херсон гласаа за присоединување кон Русија, според прелиминарните резултати објавени од таканаречената Изборна комисија на регионот.
„Околу 93,1 отсто од гласачите во украинскиот регион Запорожје го поддржале припојувањето кон Русија“, објави рускиот државен медиум, цитирајќи ги прелиминарните резултати.
Референдумите се нашироко критикувани од меѓународната заедница. Европските земји и САД ги нарекуваат „лажни“ и нагласуваат дека тие нема да бидат признаени.
