Barış Seçkin
26 Јули 2023•Ажурирај: 27 Јули 2023
РИМ (АА) - Најмалку четири лица загинаа во несреќи предизвикани од шумските пожари на многу места во јужните региони на Италија, јавува Анадолу.
На островот Сицилија, кој е најпогоден, изгаснати се 86 големи и мали пожари.
Пожарот, кој избувна вчера околу аеродромот во Палермо на Сицилија, се прошири во текот на ноќта. Во пожарната зона се пронајдени две јагленосани тела.
Аеродромот „Палермо“, кој во текот на ноќта беше затворен за авиосообраќај поради пожарот, утрово повторно беше отворен за одредени летови.
Околу 1.500 луѓе се евакуирани од областа поради пожар во близина на аеродромот „Палермо“.
Болницата „Сервело“ беше зафатена од чад поради пламените јазици што се проширија во градот Палермо, а оттаму беа евакуирани околу 200 лица.
Археолошкиот парк Сегеста од старогрчкиот период на островот, исто така, беше зафатен од пожарот.
На Сицилија, каде што продолжуваат активностите за гаснење пожари по копно и воздух, повредени се еден шумски работник и двајца пожарникари.
Деведесет и осумгодишен маж загина во пожар во близина на неговиот дом во градот Кардето во Калабрија.
Покрај тоа, почина и 88-годишна жена бидејќи медицинските екипи не можеле да дојдат до неа.
Во регионот на Калабрија во моментов има околу 80 пожари, големи и мали.
Поради шумскиот пожар што избувна во близина на градот Виесте на јадранскиот брег во регионот Пуља на југоистокот на земјата, од три хотели беа евакуирани околу 2.000 туристи.
Активностите за гаснење на пожарите во јужните региони продолжуваат, но високите температури и ветерот ги отежнуваат напорите на пожарникарите.
Регионите Ломбардија и Венето на северот на Италија се соочуваат со силен град и бурни временски услови.
Регионалната Влада на Ломбардија се подготвува да побара од централната Влада да прогласи вонредна состојба поради невремето што досега уништи многу дрвја и сообраќајни знаци, оштети згради и возила, а две лица загинаа.
