Шефицата на руската Централна банка: Нашата економија влегува во тежок процес на структурна трансформација

МОСКВА (АА) - Шефицата на Централната банка на Русија, Елвира Набиулина, истакна дека санкциите главно го погодуваат рускиот финансиски сектор, и рече дека санкциите сега ќе почнат повеќе да влијаат на реалните сектори во економијата, пренесува Агенција Анадолија (АА).

Набиулина во обраќањето во Думата, долниот дом на рускиот Парламент, рече дека поради санкциите Русија има пристап до половина од нејзините меѓународни резерви.

Таа нагласи дека споменатите резерви се состојат од злато, јуани и други средства без ризик од санкции.

„Сепак, овие резерви не овозможуваат управување со домашниот девизен пазар“. рече таа.

Набиулина потсети дека се преземени драстични мерки во однос на пазарот по санкциите.

„Сега внимателно отстрануваме некои од овие мерки. Планираме да ги направиме условите за девизна продажба малку пофлексибилни“, додаде Набиулина.

Нагласувајќи дека по санкциите започнат е нов процес во руската економија, Набиулина додаде: „Нашата економија влегува во тежок процес на структурна трансформација поради санкциите. Санкциите, кои првенствено го засегаа нашиот финансиски сектор, сега ќе почнат повеќе да влијаат на реалните сектори во економијата.“

Набиулина истакна дека главниот проблем во руската економија не се санкциите против финансискиот сектор.

Таа рече дека главни проблеми се увозот, надворешната трговска логистика и можните извозни ограничувања што може да се применат на руските производи во иднина.