Шефот на полската дипломатија: Mожно е Русија да е одговорна за истекувањето од гасоводот „Северен тек“

ВАРШАВА (АА) ‒ Полскиот министер за надворешни работи, Збигњев Рау, изјави дека Русија можно е да стои зад истекувањето од гасоводот „Северен тек“, пренесува Агенција Анадолија (АА).

Рау за Полското радио изјави дека точната причина за истекувањето од „Северен тек“ ќе ја утврдат истражувачите.

Меѓутоа, како што рече, ако се земе предвид целата ситуација во врска со енергетската безбедност во регионот на Балтичкото Море, се чини разумно да се верува дека зад истекувањето стојат руски служби.

„Русија можеби ги оштетила гасоводите за да ги продлабочи поделбите во Европа околу енергетската безбедност“, рече Рау.

Тој додаде дека саботажа слична на гасоводите „Северен тек“ може да се направи и на Балтичкиот гасовод, кој транспортира норвешки гас во Полска, истакнувајќи дека целта на Русија е да ја исплаши Европа.

Данската агенција за енергетика потврди дека се откриени три истекувања на гасоводите „Северен тек 1“ и „Северен тек 2“.

„Северен тек 2“ се протега паралелно со првиот гасовод, и тој е во руска сопственост. Изграден е во септември 2021 година, но не е пуштен во функција, бидејќи Германија одби да го одобри. Проектот во потполност е запрен само неколку дена пред почетокот на руската војна против Украина на 24 февруари.

Русија го запре протокот од гасоводот „Северен тек 1“ на 31 август.